15/09/2017
Хиймэл шүдний арчилгаа
Ерөнхий ойлголт
Хиймэл шүдэлбэр гэдэг нь шүд болон шүдний эгнээнд үүссэн согогыг нөхөн сэргээж буй эмчилгээний нэгэн төрөл юм. Хиймэл шүдийг Авагддаг болон авагддаггүй гэсэн 2 үндсэн төрөлд хуваадаг. Технологи болон материал, аманы хөндийд тогтох байдлаар нь ийнхүү хуваагддаг.
Авагддаг хиймэл шүд буюу – Шахмал буйлтай шүдэлбэр, цутгамал нумтай шүдэлбэр / DENTURE, removable partial denture /. Хийгдэх материалаараа ялгаатай боловч амны хөндийд бэхлэгддэх байдлаар ижил юм. Хэрэглэх хугацаа нь харилцан адилгүй боловч дунджаар 3-5 жил хэрэглэнэ. Учир нь дээрх хугацаанаас хэтрэх тусам таны шүдэлбэрийн чанар муудаж, шүдэлбэрт нүхжилт үүсэн улмаар бохирдол их болох, цаашлаад амны хөндийн эрүүл ахуйд сөрөг нөлөө үзүүлдэг. Мөн нас явахын хэрээр таны амны хөндийн анатоми өөрчлөгдөж хэрэглэж байгаа хиймэл шүдэлбэр таархаа болиж холгох болон хөдөлгөөнтэй, тогтворгүй болдог.
Хиймэл шүдийг урт удаан хугацаанд тогтмол хэрэглэхийн тулд арчилгаа маш чухал юм. Хиймэл шүд нь таны төрөлх шүдтэй адил арчилгаа хийлгэхийг шаарддаг.
Хиймэл шүдийг өглөө болон орой унтахын өмнө, мөн хооллосны дараа тогтмол цэвэрлэх хэрэгтэй. Учир нь таны амны хөндий янз бүрийн бактер, нянгийн халдварт байнга өртөж байдаг. Хиймэл шүд нь эдгээр нянгийн халдвар дамжуулах нөхцөлд бүрдүүлдэг.
Шахмал буйлтай хуванцар шүдэлбэрийг дундаж хатуу болон, хатуу үстэй сойзоор угааж болно. Гэхдээ шүдэлбэрийн гадаргууг гэмтээх болон зураас үүсгэхээс болгоомжлох хэрэгтэй. Сүүлийн үед хиймэл шүдэлбэрийг ариутгах болон цэвэрлэх зориулалттай тусгай бүтээгдэхүүн худалдаан гарах болсон. Энэхүү бүтээгдэхүүн нь шүдэлбэрийг цэвэрлэх болон ариутгахаас гадна шүдэлбэрийн чанарыг удаан хугацаанд сайнаар хадгалахад нөлөөлдөг. Шүдэлбэрийг хэт халуун усанд угаахаас зайлсхийх хэрэгтэй. Халуун ус нь шүдэлбэрийн материалын чанар болон тогтоцод муу нөлөөтэй.
