17/12/2023
هاد الضرسة وقع ليها واحد الكسر في جزء منها، بلا شي ادوات كان مستحيل نقدرو نرجعوها عمليا كيف كانت في نفس الحصة. حافظت على قتيل العرق لي فيها حيث ماكايبانش فيه شي مشكيل.
حطيت la digue باش نحمي الضرسة من اللعاب او الرطوبة ديال الفم (العمارة ماكاتبغيش وجود المياه). بديت ببناء الأجزاء الجانبية ديال الضرسة باش تسهال العمارة من بعد. كاناخد وقت طويل باش نخلي contact مابين الضراس يكون مزيان بلا مايدخل الماكلة او في نفس الوقت يسهل عملية التنظيف.
هنا كايجي دور Ribbond, باش نخلي الضرسة قوية في مواجهة ضغط ديال العضة او الماكلة مع الوقت، كايلعب دور امتصاص القوى لي كاتكون على الضرسة بحال مونتيسوور ديال طوموبيل، باللغة العامية، كاطاكي على الضرسة من الهرس ! كانكملو العمارة بكومبوزيت مشارجي مزيان بالكاياس. ماشي الكاياس نيت ولكن خاص نوع لي كايكون فيه نسبة ديال الحجرات (ميكروسكوبية او نانوسكوبية) في الداخل ديالو باش يخلي العمارة ثابتة مع الوقت.
ديما غادين تلاحظو ان الخدمة ديالنا فيها بزاف التفاصيل، واحد التفاصيل لي ماكايساليوش. او نهار على نهار كانلقا راسي قدام تفاصيل اكثر.
كل حالة كاتعلمك أكثر، كاتحطك قدام تحديات أكثر. عمرك كاتقول وليت سلطان العمارات 😅 في الدونطير (او حتا مهن اخرى) كاين واحد منحنى التعلم لي ماكايساليش ماعندوش نهاية. المهم هو تكون محترم هاداك المنحنى ماشي خارج عليه.
