02/06/2024
Don't get addicted to sipping !
අද සමාජයේ දත් දිරායාමට බලපාන හේතු , සමහර විට අපි පොඩිකාලෙ පොත් වලින් ඉගෙන්න ගත්ත හේතු වලට වඩා වෙනස් ස්වරූපයක් ගන්නවා. " දත් නරක්වෙන්නේ, පැණිරස කෑවොත් " කියලයි අපි කටපාඩම් කලේ.
පාඩම් වැඩක් කරන ගමන් හෝ TV එක බලන අතර හෝ පරිගනකයේ වැඩක් කරන අතරතුර හෝ ෆෝන් එක ඔබන අතරතුර මොනවාහරි බීම වීදුරුවක්/ බෝතලයක් ලගින් තියාගෙන දිගු වේලාවක් ටික ටික පානය කිරීම දැන් බොහෝ අයගේ පුරුද්දක් වෙලා.
ඒ පුරුද්ද පැණිරස දෙයක් කෑමටත් වඩා දත් වලට අහිතකරයි කියලා බොහෝ අය හිතන්නෙ නෑ. ඒ පානය කෘතිම පැනිරස පානයක්ම විය යුතු නෑ. ස්වාභාවික පලතුරු බීම එකක් වුවත් හානිකරයි. ආම්ලික පානයක් නම් දත් වලට වෙන හානිය තවත් වැඩියි. කෝලා වර්ගයක් හෝ එවැනි පානයක් නම්, හානිය බෙහෙවින්ම වැඩියි.
දත් වලට වඩාත් උචිත ph අගය සාමාන්යයෙන් 7 ආසන්නයේ වෙනවා. ( ආම්ලික හෝ භාශ්මික නොවන උදාසීන තත්වය ආසන්නයේ ). මුඛයේ ඇති ඛේඨය මෙම ph අගයේ පවතින අතර එයට අමතරව ඛේඨයේ දත්වලට හිතකර කැල්සියම් සහ වෙනත් පෝශකද අන්තර්ගත වෙනවා. අපි ගන්නා බොහෝ පාන වර්ග ආම්ලිකයි. ආම්ලික පරිසරයකදී දතේ මතුපිට ස්තරය දියවීමකට ලක් වෙනවා. එසේම පානයක් ගන්නා සෑම ව්ටම කෙලවල ඇති පෝශක සංඝටක මුඛයෙන් තාවකාලිකව මොහොතකට ඉවත් වෙනවා . බීම වර්ගයක් ටික ටික තොලගාමින් දිගු වේලාවක් තිස්සේ බීමට පුරුදු වී සිටින අයගේ ඉහත ක්රියාවලිය නිතර නිතර සිදූවීම නිසා දත් වල එනමලය දියවීමට ලක්කරමින් ( dental erosion ලෙස හදුන්වන රෝග තත්වයට මග පෑදීම ) දත් දුර්වල කරනවා. මෙය දත් හිරිවැටීම් ඇතිවීමට, දත් දුර්වර්ණ වීමට හේතු වෙනවා වගේම දතේ ශක්තිමත් බව අඩු වීමෙන් දත් දිරා යාමට සහ කැඩී යාමටද හේතු වෙනවා.
ඉතිං මෙයට පිලියම තමා, මේ පුරුද්දෙන් මිදීම. ආරම්භයක් ලෙස විකල්පය ලෙස බීම වර්ගයක් වෙනුවට පිරිසිදු වතුර වීදුරුවක් පානය කිරීමට පුරුදු වෙන්න පුලුවන්. ජලයේ ph අගයත් බොහෝ දුරට 7 ට ආසන්නයි.
( හැබැයි ඉතිං එහෙම කිව්වයි කියලා වතුර බෝතලයක් කිහිල්ලෙ ගහගෙන දවස තිස්සෙම විනාඩි පහෙන් පහට ඒක සිප් කරන එක නම් හොද නෑ. එතකොටත් කටේ කෙලවල තියෙන buffering effect එක නිතර නිතර disturb වීමෙන් , ඉහත කියපු අහිතකර රෝග තත්වම අඩුවැඩි වශයෙන් ඇතිවෙන්න පුලුවන්. ඒ නිසා පමන දැනගෙන " ඇල් වතුරත් නිවලා බොන්න ඕන ".😊)
