22/01/2026
ជូនជាព័ត៌មាន កុំអោយមានការយល់ច្រឡំ។
ថ្មីៗនេះ គណៈទន្តពេទ្យកម្ពុជា បានសង្កេតឃើញថាមានការផ្សព្វផ្សាយតៗគ្នាតាមបណ្តាញសង្គមលើករណីកើតជំងឺមហារីកក្នុងមាត់ (oral cancer) ដោយការផ្សព្វផ្សាយទាំងនោះបានភ្ជាប់មូលហេតុទៅនឹងការដកធ្មេញ។
គណៈទន្តពេទ្យកម្ពុជា សូមជូនដំណឹងដល់សាធារណៈជនមេត្តាជ្រាបថាយោងតាមភស្តុតាវិទ្យាសាស្ត្រ ការដកធ្មេញមិនបណ្តាលឱ្យកើតជំងឺមហារីកក្នុងមាត់នោះទេ។ ក្រុមការងារជំនាញរបស់គណៈទន្តពេទ្យកម្ពុជាបានចុះសួរសុខទុក្ខអ្នកជំងឺផ្ទាល់។ តាមរយៈការសួរប្រវត្តិអ្នកជំងឺ និងពិនិត្យឯកសារព្យាបាល ក្រុមការងារសូមបញ្ជាក់ថាករណីជំងឺមហារីកក្នុងមាត់នេះមិនបណ្តាលមកពីការដកធ្មេញនោះទេ។ ជាទូទៅជំងឺមហារីកក្នុងមាត់អាចធ្វើឱ្យលេចចេញជារោគសញ្ញាស្រដៀងគ្នានឹងជំងឺមាត់ធ្មេញផ្សេងៗដូចជា ការឈឺធ្មេញ ការរង្គើធ្មេញ ការកើតមានដំបៅលើជាលិកាទន់ជាលក្ខណៈរាលដាល ការហើមកូនកណ្តុរក្រោមឆ្អឹងថ្គាម ។ល។
កត្តាដែលជំរុញឲ្យកើតជំងឺមហារីកក្នុងមាត់រួមមាន៖ កត្តាតំណរពូជ ការប្រើប្រាស់ផលិតផលថ្នាំជក់(រួមទាំងការជក់បារីអេឡិចត្រូនិច) ការពិសាគ្រឿងស្រវឹង ការបរិភោគស្លាម្លូជាប្រចាំ ការឆ្លងរោគ human papilloma virus (HPV) ការធ្វើអនាម័យមាត់ធ្មេញមិនបានល្អ កត្តាចំណីអាហារ និងកត្តាអាយុ។ ក្នុងនោះការប្រើប្រាស់ផលិតផលថ្នាំជក់ និងការពិសាគ្រឿងស្រវឹង គឺជាកត្តាចម្បងដែលជំរុញឱ្យកើតជំងឺមហារីកក្នុងមាត់ ដូច្នេះគណៈទន្តពេទ្យសូមឆ្លៀតឱកាសនេះណែនាំដល់សាធារណៈជនឱ្យធ្វើអនាម័យមាត់ធ្មេញឱ្យបានល្អ និងចៀសវាងការប្រើប្រាស់ផលិតផលថ្នាំជក់ និងពិសាគ្រឿងស្រវឹង ដើម្បីសុខភាពមាត់ធ្មេញល្អប្រសើរ។
ជាថ្មីម្តងទៀត គណៈទន្តពេទ្យកម្ពុជាសូមអំពាវនាវដល់សាធារណៈជនមេត្តាវាយតម្លៃប្រភពព័ត៌មានក្នុងបណ្តាញសង្គម និងធ្វើការផ្សព្វផ្សាយបន្តប្រកបដោយស្មារតីទទួលខុសត្រូវខ្ពស់ ដើម្បីចៀសវាងការបង្កភាពភ័យខ្លាចដល់អ្នកជំងឺដទៃ និងធ្វើឱ្យប៉ះពាល់ដល់ទំនុកចិត្តរបស់សាធារណៈលើវិជ្ជាជីវៈទន្តសាស្ត្រ។ គណៈទន្តពេទ្យកម្ពុជាតម្កល់សុវត្ថិភាពអ្នកជំងឺ និងសុខុមាលភាពរបស់ប្រជាជនជាអាទិភាពចម្បងជានិច្ច៕
