06/11/2020
الدعامه او المسمار (post)
ايه الدعامه دي و ليه و امتى بعملها و انواعها الشائعه
الدعامه او المسمار او ايا كان الاسم الدارج و الشائع ليها هي عباره عن حاجه شبه المسمار بتتحط بداخل قناة العصب بعد الانتهاء منه بطريقه معينه و على طول معين من حشو العصب
طيب امتى بحتاج استعمل دعامه و هي ايه وظيفتها
نبدا بدواعي استخدامها و هي ان الضرس او السنه جزء كبير منه متضرر بعد حشو العصب او الجزء المتبقي منه ضعيف جدا على انه يتحمل اني استخدم حشو او طربوش عشان كده بستعملها من اسمها كدعامه
طيب وظيفتها بتدعم السنه انها تقدر تتعمل القوة اللي نازله عليها اثناء المضغ و الاكل بانها بدل ما القوه كلها بتنزل على السنه بيتنقل منها جزء كبير للدعامه اللي بتخلي السنه تتحمل
انواع الدعامات
اول نوع و الاكثر شيوعا و اللي تقريبا بطلنا نستعمله هو الدعامه المعدن الذهبي (gold plated ) و مشكلتها انها دعامه ضعيفه جدا
النوع الثاني الدعامه المعدن او ال stainless steel او التيتانيوم
و دي ايضا دعامه شائع استخدامها جدا بس فيها شويه مشاكل و هي انها بتتربط زي المسمار و ده مع مرور الوقت و القوة اللي نازله على السنه ممكن تسبب ان الجذور بتاعت السنه تتكسر
الدعامه الفايبر او fiberpost
و دي عباره عن دعامه فايبر او الياف مقواه و بيبقى لونها تقريبا شفاف او ابيض و دي حاليا الاكثر و الافضل استخداما اولا لانها مش بتتربط زي المسمار دي بيتم تثبيتها داخل قنوات العصل باستخدام مادة مخصصه ليها بحيث انها متنقلش اي قوة على السنه و متتسببش في ان السنه تتكسر
الدعامات المخصصه او ال custom post
و دي اخر نوع بنستخدمه في حالة ان كل الدعامات السابقه مش نافعه لان قناة العصب كبيره جدا و اكبر من الدعامه و وقتها الدعامه مش هتبقى قادرة تقوم بدورها او وظيفتها بنضطر نستخدم النوع ده و ده عن طريق اننا بناخد مقاس لقناة العصب اللي هتتحط فيها الدعامه و بتتعمل مخصوص للسنه و ممكن تكون معدن او تكون من الزيركون
