09/09/2026
النهاردة ٩-٩-٢٠٢٦، بقالنا ٥ سنين بالتمام من يوم افتتاح العيادة في ٩-٩-٢٠٢١ 🤍
٥ سنين عدّوا بكل تفاصيلهم، وأقدر أقول من قلبي:
الحمد لله ربنا منّ علينا من واسع كرمه وفضله.
ويشهد الله إني عملت أقصى جهدي في كل حالة نورتنا، وكنت على قد ما أقدر بعمل المهم اللي يفيد المريض فقط، وبأفضل جودة أقدر عليها، وعلى قد العلم والخبرة اللي ربنا منّ عليّا بيهم.
وعلى مدار الـ٥ سنين، كنا شغالين بنظام المواعيد المحددة مسبقًا، وده كان مريح جدًا لينا وللمريض.
كنا على قد ما نقدر بنحاول نحترم وقت المريض، عشان ما يضيعش يومه كله في الانتظار في عيادة الأسنان، وفي نفس الوقت كان ده بيساعدنا إننا ندي كل اهتمامنا للحالة الموجودة قدامنا، من غير ما نتشتت بالزحمة أو التأخير.
والحمد لله ربنا أكرمنا إننا نحافظ على المستوى ده طول الفترة اللي فاتت.
لكن أهم حاجة حابة أقولها النهاردة هي شكرًا لكل شخص نورني في العيادة ووثق فيا.
زي ما دايمًا بقول:
ربنا بيرزقني بالمرضى اللي بشتغلهم.
وقد إيه فعلًا ناس محترمة وجميلة ومريحة…
وحقيقي ده رزق من ربنا.
أنا بتشرف بكل شخص اشتغلته، وعلاقتنا بكل ضيوفنا على مدار السنين عمرها ما كانت مجرد شغل.
زيارتكم كانت بتفرق معانا، وكنا بنحبكم ونحترمكم، ونحب نشوفكم دايمًا في أحسن حال.
وزي ما كنت دايمًا بحب أشوفكم وأشتغلكم، وكنت بسعى إن الزيارات تبقى مريحة نفسيًا وجسديًا، وعلى قد ما أقدر من غير ألم…
د. حنان ناصف دلوقتي بتعمل ده بشكل أفضل مني كمان.
وأنا واثقة فيها، وواثقة إنها هتاخد بالها من كل ضيوفي الغاليين، وهتدي كل واحد فيكم نفس الاهتمام والرعاية اللي تستحقوها. 🤍
شكرًا مرة تانية…
لأنكم كنتوا دايمًا ناس هينة ولينة وذوق طول الوقت. ♥️
وشكرًا على ثقتكم ، وكل كلمة حلوة، وكل موقف جميل، وكل مرة اخترتوا فيها عيادتنا.
د. مريم صباحي 🤍
