07/12/2020
المرة اللي فاتت اتكلمنا عن التسوس وإزاي بيحصل و عرفنا إن في حلقة مكونة من البكتريا و السكريات و سطح السنة المعرض للتسوس و زمن التعرض .
أما المرادي فهنبدأ بأول وأهم وسيلة عملية للحفاظ على أسناننا من التسوس و غسيل الأسنان بالفرشاة و المعجون ..طبعاً الموضوع مش جديد بس إحنا هنحاول نتناوله بطريقة بسيطة و في نفس الوقت علمية , و أكيد مهما كنت عارف معلومات عن الموضوع هتطلع بحاجة تفيدك . لأنك أكيد مش عايز تفقد أسنانك في سن مبكر و لا عايز تفضل رايح جاي على العيادة عشان تصلح حاجة في إيدك تحافظ عليها من دلوقتي, خلي العيادة أحسن تروحها بمزاجك و تعمل فيها تقويم, تجميل , أو تعالج مشكلة إنت مولود بيها أصلاً .
هنتكلم أول حاجة عن فرشاة الأسنان , ثم معجون الأسنان , و أخيراً عن طريقة الغسيل :
أولاً: فرشاة الأسنان :
• أولاً الفرشاة أداة شخصية خاصة بصاحبها فقط شديدة العدوى ,علم أخوك الصغير وابنك كده .
• اختر فرشاة ذات رأس صغيرة نسبياً لسهولة التحكم والوصول لكل أسطح الأسنان.
• بغض النظر عن العلامة التجارية يوجد 3 درجات من خشونة الشعيرات ( ناعم,وسط,خشن),هنختار الوسط إلا إذا كان في نزيف جامد في اللثة ساعتها هنختار الناعم و عموماً هنتكلم في مرات قادمة عن صحة اللثة.
• رص الشعيرات بيختلف من علامة تجارية لأخرى و من إصدار لآخر لكن الفرشاة البسيطة اللي شعيراتها في نفس الاتجاه والطول ـأو بزيادة بسيطة في طول الشعيرات الأماميةـ هتقضي الغرض وزيادة.
• فترة صلاحية فرشاة الأسنان فيها كلام كتير حتى إن بعض العلامات التجارية بتحط دليل لوني لتغيير الفرشاة بدون دليل علمي قوي المهم إن الفرشاة تكون بتنظف كويس و مش بتجرح اللثة و تكون بتتغسل كويس بعد كل غسلة .
• يستحسن تكون فرشاة الأسنان بغطاء لعدم نشر أو استقبال الميكروبات و كمان عشان تقدر تاخدها معاك الشغل أو الدراسة, و متتكسفش لأن اللي بياخد معاه سجاير ضارة بالصحة و مسببة للوفاة مش بيتكسف .
• في أنواع خاصة من الفرش زي فرشاة التقويم , و الفرشاة الكهربية ممكن نتكلم عنها في مرات أخرى .
ثانيا: المعجون :
• قبل مانتكلم عن مكونات المعجون لازم نأكد على إن الكمية الكافية لغسيل الفم كله غسيل فعال لاتزيد على حجم حبة الفاصولية و مش لازم نملى سطح الفرشاة كلها بالمعجون زي ما بنشوف في إعلانات المعاجين .
• العنصر الأساسي في معجون الأسنان هو الفلور و هو عنصر نشط و بيكون روابط كميائية قوية و بيساعد على إعادة تمعدن مينا الأسنان (remineralization) , و بالتالي إعادة قدرتها على مقاومة التسوس.
• باقي المكونات الأساسية هي : مضاد بكيري, مذيب عضوي, جلسرين لحفظ قوام المعجون ,معادل حموضة, نكهات ألوان , مواد كاشطة لكحت الترسبات , و دي موجودة في كل المعاجين و خاضعة لمواصفات دولية و من غير فروق تذكر .
• المكونات الاختيارية زي: مانعات حساسية الأسنان ,مزيلات الترسبات العضوية (plaque control ) دي نتكلم عنها في منشورات صحة اللثة.
• معاجين التبييض تؤخذ بوصفة طبية ( روشتة ) و استخدامها بعشوائية بيضر الأسنان .
ثالثاً: طريقة الغسيل ( التفريش )
• محتاجين نغسل أسناننا مرتين إلى 3 مرات يومياً في المتوسط و أهمهم المرة اللي قبل النوم إللي بتجرد البكتريا من أطول فترة بتستغلها في النخر.
• إحساسك بأن أسنانك نظيفة و خالية من بقايا الأكل وروائحه و الانتعاش هتكون أكبر حافز ليك للاستمرار زي ما كانت هي الحافز لناس كتير قبلك بس من غير وسوسة.
• ممكن تغسل أسنانك بالطريقة الرأسية اللي شرحتها صفاء أبو السعود , وممكن برده بالطريقة الدائرية المعدلة و دي ميزتها مراعاة شكل الأسنان و الحفاظ على اللثة .
• غسيل الأسنان و الضروس الخلفية بذمة بياخد مش أقل من دقيقتين.
و أخيراً غسيل الأسنان عادة يومية صحية ومن صفات الشخصيات الناجحة, ومن أفضل الطلاق لقياس قوة الإرادة لكل الأعمار.
لو استفدت من البوست و مهتم تعرف اكتر عن وقاية الاسنان متنساش تعملنا فولو عشان يوصلك بوستاتنا اول بأول .
عيادات درة لطب الأسنان
207 ب – شارع العشرين – متفرع من شارع الثروة المعدنية
البوابة الاولى – حدائق الأهرام
تلفون : 01069522852
