11/06/2021
السلام عليكم
ازيكم يا حلوين
معاكم هاجر الديب اخصائي طب وجراحة الفم والاسنان
حبيت اتكلم عن حاجة مهمة بشوفها كل يوم في العيادة
وهيا تسوس اسنان الاطفال في سن مبكرة جدا سنتين وتلات سنين
ودا بيرجع بشكل رئيسي لنقص الوعي عند الامهات
للاسف في المنظومه الطبيه هنا في مصر عندنا قصور في التوعية المجتمعية
ومن ضمن الحاجات المهمة لما تكون ام جديدة واول طفل ليها لازم تتعلم بشكل جيد العناية بطفلها
ومن ضمن الحاجات المهمة اللي لازم الام تهتم بيها اول ما الطفل يبدأ يسنن لازم نبدأ نعتني باسنانه
اولا لازم نستخدم فرشه اطفال ناعمه بدون معجون ولا اي حاجة ولو مش موجوده نقدر تستخدم صابع الفرشة السيليكون او اضعف الايمان شاش طبي لفيه على صابعك وامسحي اسنان طفلك او حتى شربيه بوق ميه يغسل بيه اسنانه من بقايا اللبن
كمان لازم ناخد بالنا من الرضاعه الليلية عشان بقايا اللبن اللي بتفضل في فم الطفل بتتخمر وبتبدأ تعمل تآكل في الاسنان
ونسمع مصطلح شائع جدا الام تيجي تقول اسنان طفلي طلعت بايظه
لا يا فاندم الاسنان بتطلع سليمه بس مع الاهمال الغير مقصود بيحصل التآكل والتسوس
كمان نقطه لازم الام تاخد بالها منها ان تسوس اسنان الاطفال مش بالضروره يبقا لونه اسود ممكن يبقا بقع صفرا او بني
مجرد ما الطفل يوصل ٣ سنين ويبدأ يستجيب للاوامر لازم يتعلم يغسل اسنانه ونبدأ معاه بمعجون اطفال عشان بتكون نسب المواد الكيميائية فيها ضعيفة ومافيش قلق لو تم بلعه وبيكون متوفر بأطعمة مختلفه عشان الاطفال يحبوه ويحبو تجربة غسيل الاسنان ويبقوا متحمسين دايما لغسيل الاسنان
متوفر بالفراوله والموز والشيكولاته
معجون الكبار فيه نسب عاليه من الفلورايد ودا في منه ضرر لو الطفل بلعه
في اطفال حبايبنا من ذوي الاحتياجات الخاصه دول كمان بيحتاجو عناية خاصه باسنانهم عشان سعات بيكون عندهم تسوس واسنانهم بتوجعهم بس ما عندهمش القدرة على التعبير عن الالم او مكانه اتمنى الامهات تاخد بالها من النقطه دي
اتمنى اكون افدتكم واتكلمت في مواطن تثري معلوماتكم واي استفسار انا تحت امركم جميعاً
دامت ابتسامتكم منيرة
