28/01/2022
دائما ما ينصح أطباء الأسنان بتركيب طربوش او تلبيسة او crown بعد سحب العصب وعلاج الجذور.
أولا: أهمية الطربوش بعد حشو العصب:
1- أسباب تؤدي الي ضعف الضرس.
السبب الأول: لما الدكتور بيعمل حشو عصب لضرس بيكون غالبا نتيجة كسر او تسوس كبير في الضرس ده, كمان الدكتور بيحتاج يفتح فتحة معينة اسمها access cavity علشان يقدر يوصل للقنوات العصبية وينظفها كويس جدا. فالتسوس او الكسر مع حفر الدكتور للضرس بيضعفه طبعا أكتر. ودي أول نقطة.
السبب الثاني: نقطة أخري بتسبب ضعف الضرس وهي موت العصب نفسه, لأن القنوات العصبية اللي داخلها العصب بيكون داخلها أيضا الشعيرات الدموية اللي دورها توصيل العناصر الغذائية الضرورية للضرس زي الكالسيوم والفلورايد, وهذا القنوات طبعا بيتم ازالتها مع العصب وبالتالي الضرس لن يصل له غذاءه مرة تانيه. فأصبح “ضرس ميت” لكن موجود في مكانه.
السبب الثالث: الضرس لما العصب بتاعه يموت. طبيعي ميحصلش أي احساس في الضرس ده بعد كده الا اذا حصل فيه ألم نتيجة خراج أو عدوى بكتيرية. ودي ألمها بيكون عند نهاية جذر الضرس وليس مكان عصب الضرس. عدم الاحساس في الضرس بيتسبب في انه لو حدث تسوس في جسم الضرس مرة تانية لن تشعر به. وبالتالي يزيد التسوس مع الوقت ويضعف الضرس أكتر وأكتر.
هذه الأسباب الثلاثه يمكن تجنبها بعمل طربوش لحماية الضرس الضعيف من الكسر. وبالتأخير في الوقت ممكن الكسر يحدث ويصل الي جذور الضرس, فيكون الحل هنا غالبا هو الخلع وتخسر ضرسك. طبعا كل حاجه هتعملها لازم يكون الدكتور شاطر ويعملها كويس والا “كأنك لم تفعل شيئا”.
2- تغيير لون الضرس بعد حشو العصب.
الضرس أو السن بعد فترة تتراوح من شهور لعدة سنوات ممكن يبدأ في تغيير لونه مع الوقت ويصبح أغمق من الأسنان المحيطة. لذلك فتغطية السن المتغير لونه بطربوش أو بعدسة تجميلية نفس لون أسنانك تحل هذه المشكلة. ولو طربوش هيكون أفضل لحماية الضرس أو السن من الكسر كما قلنا سابقا.
3- حماية علاج الجذور وحشو العصب من الفشل وحدوث الخراج “عدوى بكتيرية”
من علامات جودة حشو العصب انه يمنع تسريب ودخول البكتيريا الموجوده في اللعاب في الفم الي داخل القنوات العصبيه ومنها الي الانسجه المحيطه بالضرس وهي عظام الفك. لذلك جودة حشو القنوات العصبيه بيعتمد علي عدم ترك أي فراغات داخل القنوات. وأيضا الانهاء من الخارج بحشو خارجي جيد النوع وبطريقة صحيحه حتي يمنع تسريب أي لعاب كما قلنا. كذلك عمل الطربوش جيداااا ليحيط بالحشو والضرس من كل اتجاه يمنع أيضا تسريب أي شئ الي داخل الضرس وبالتالي حماية عملية علاج الجذور ككل.
