15/09/2026
انا حابة اتكلم عن موضوع محرج شوية...
بس الواحد بيحب يبقي صريح وأمين بردو
ايه يضمنلك ان الدكتور اللي رايحله شاطر؟ حشواته مش بتقع بعد شهر او شهرين؟ تختار اصلا ازاي الدكتور اللي تروحله وتعالج اسنانه؟
وهل الحشوات انواع وبراندات وغيره وغيره؟
مبدأيا كدة، لو انت في ذرة شك في الدكتور بعد ماكشفت عنده ومكمل معاه شغل وبردو شاكك فيه ورايح تكتب بوستات او تحط اشعات تشوف شغله تمام ولا لأ من دكاترة عالسوشيال ميديا، ف اعذرني انت كدة بتعك الدنيا
ازاي اصلا تسمح للدكتور يديك بنج ولا يبدأ في ضرس وانت نفسيا مش مرتاح؟ وازاي هتثق في اراء دكاترة عالسوشيال ميديا وهما مشافوش حالتك ولا كشفوا عليك clinical؟
طب اتاكد ازاي من الدكتور دة؟ اولا تشوف ريفيوهات علي صفحته او علي جوجل مابس
ثانيا تسال في جروبات سكان المنطقة اللي انت ساكن فيها وعيادة الدكتور فيها عشان تشوف بيتقال عنه ايه
ثالثا تشوف صفحاته وصور الحالات اللي بيحطها قبل وبعد وتشوف بيتكلم عن الحالة ازاي لان دة طبعا بيعكس شخصية الدكتور وطريقته
رابعا تشوف قرايبك او صحابك راحوا لمين وارتاحوا له
خامسا لو خلاص قررت وروحت لحد بتاءا عالعوامل السابقة، الكشف ثم الكشف ثم الكشف، تشوف الدكتور بياخد منك medical and dental history مفصل، بيكشف علي اسنانك بالكامل، بيشرحلك باستفاضة المشاكل اللي عندك وحلها ازاي، هيعمل اشعة لو محتاج ولو الموضوع اكبر هيطلب منك اشعه من مركز جنبه مثلا
بعد كل دة هتيجي الراحة النفسية بقي، الدكاترة والتعامل بيكون قبول، ممكن دكتور يكون شاطر جدا وامين بس انا مش مرتاحاله ومش متقبلاه، دي حرية شخصية، دكتور شاطر جدا بس مش صبور، مش متكلم، مش بيشرحلك كل حاجة زي مانت هتعوز مثلا
وقتها عادي خد وقتك، خلص الكشف، وشوف دكتور تاني اكشف عنده لو انت مقتنعتش بكلام الاولاني
والموضوع مفيهوش اي حاجة عيب ولا احراج دي حرية شخصية بحتة...
وتدفع كشف والتاني والتالت احسن ما تكمل مع دكتور لا انت واثق فيه، ولا مرتاح ل شغله، وهتدفع فلوس بردو قد كدة، وممكن في الاخر متكملش معاه وتكسل تروح مواعيدك ف تدفع اضعاف اضعاف الفلوس عند دكتور تاني نتيجة تأخير العلاج وعدم تكملته
وطبعا الكومنت اللي مكتوب دة لو حد عمله معايا انا هطلبله الشرطة😂😂😂😂
مينفعش ابدا حد يتعدي علي دكتور ويدخل يفتح الادراج عشان مش واثق في الخامات اللي هيشتغل بيها، روحتله من الاول ليه طيب مادام خايف كدة؟؟
