23/09/2026
هل الكشف في عيادة الأسنان خدمة مجانية؟
في مفهوم مغلوط (من وجهة نظري) عند بعض الأطباء وعيادات الأسنان، وهو إن الكشف مجرد مدخل لبدء الخطة العلاجية، وبالتالي مفيش داعي يبقى له قيمة مادية، طالما المريض هيدفع في العلاج بعد كدة.
ليه أنا شايف إن ده مفهوم مغلوط؟
أولا، القيمة اللي المريض بيدفعها للكشف مش مجرد تمن استهلاك الأدوات أو الوقت اللي الطبيب قعده معاه.
الأهم هو قيمة المجهود الطبي في فحص المريض، ومناظرة الأشعة أو التحاليل لو موجودة، ومحاولة الوصول لتشخيص للمشكلة.
ثانيا، قيمة تحليل المعلومات دي، وتحديد سبب المشكلة أو المشاكل، وبناء خطة علاجية مناسبة.
ثالثا، قيمة خبرة الطبيب، خصوصا لو طبيب قديم أو متخصص في مجال معين، واللي بتساعده يوصل لتشخيص أدق وخطة علاجية أفضل في وقت أقل.
فلو افترضنا جدلا إنه ممكن يكون مقبول تجاريا إن المريض ما يدفعش قيمة الكشف، على أمل إن الطبيب هيستفيد ماديا بشكل أكبر لو الخطة العلاجية اتنفذت، فأنا شايف إن المبدأ ده مينفعش يتطبق على الخدمة الطبية.
لأن ده بيؤدي تدريجيا إلى تسليع الخدمة الطبية.
يعني بدل ما المريض يبحث عن الطبيب الأفضل لتشخيص حالته وعلاجها، يبدأ يبحث عن الطبيب أو العيادة اللي بتقدم له "عرض" أفضل.
وده في رأيي بيغير طبيعة العلاقة بين الطبيب والمريض من تقديم خدمة طبية لها قيمة، إلى بيع منتج أو خدمة تجارية.
ونفس الفكرة تنطبق على الاستشارات الطبية للمرضى..
الصورة دي فيها مثال على موقف حصل من يومين تلاتة.
مريض من خارج مصر، عايز ييجي مصر يتعالج، فبعت للعيادة الأشعة بتاعته وطلب الرأي.
*أنا عن نفسي برفض تشخيص الحالات عن طريق الواتساب، وبشوف إن ده شيء غير سليم طبيا.
فطلبنا من المريض استكمال البيانات المرضية وإرفاق كامل الأشعة، وذلك لمحاولة بناء (رأي طبي/جراحي مبدئي) مبني على معلومات كافية.
🚩🚩(رأي مبدئي ، لأنه لا يمكن أن يغني عن الفحص الاكلينيكي للمريض)🚩🚩
وطبعا، نظير مبلغ بسيط يليق بقيمة الاستشارة الطبية المتخصصة.
وكان ده رأي المريض الموجود في الصورة.
وتمسكنا بنظامنا في العيادة.
لأننا ببساطة بنعتبر الكشف والاستشارة الطبية خدمة مستقلة لها قيمة. فيها الطبيب بيقدم خبرته ومعرفته وقدرته على التشخيص واتخاذ القرار الطبي.
وفي النهاية، احترام المهنة يبدأ من احترامنا نحن كأطباء لقيمة ما نقدمه.
لما الطبيب نفسه يتعامل مع علمه وخبرته وكأنهم شيء مجاني، هيكون صعب يقنع المريض بعد كدة إن الطب مهنة لها قيمة، وإن القرار الطبي والخبرة الطبية مش مجرد جزء من "عرض سعر" للعلاج.
