22/05/2019
هتكلم معاكم النهارده عن موضوع مهم يخص ضرس العقل
لازم نكون عارفين ان ضرس العقل بيبدأ رحله ظهوره من 16 ولحد 22 سنه 😬
احيانا بيكون الفك السفلي صغير انه يدي مساحه لضرس العقل انه يظهر فيبدأ ضرس العقل في المقاومه علشان يجيب حقه 😁
المقاومه دي بتكون نتيجتها يا اما بيقدر يطلع بشكل سليم بس بعد ما ضغط علي الاسنان وحركها للامام وبالتالي بالتالي بتلاقي الاسنان الاماميه بقت فوق بعضها واثر علي شكلها .
او الاحتمال التاني ان ضرس العقل بيخسر في الحرب دي وبالتالي بيضطر انه يغير مساره ويطلع بميل وبشكل غير صحيح لكن للاسف الميل دا بتكون نتايجه مش كويسه
اولا بيعمل ضغط علي الضرس اللي جمبه ودا ممكن يسبب الم وتآكل في الضرس دا
ثانيا بيظهر منه جزء بسيط في الفم وبالتالي بيفضل جزء من اللثه عليه لكن الجزء دا بقي اشبه بحفره بيدخل جواها الاكل والبكتريا وبيكون صعب تنظيفها وبالتالي بيحصل فيها التهاب ووجع كبير خاصه كمان ان الجزء دا من اللثه بيبدأ ضرس العقل في الفك العلوي يضغط عليه مع العض ودا بيزود الالتهاب والالم اللي بيوصل لدرجه الصداع والم في الفك كمان
الحل بيكون لو الضرس طالع بشكل سليم فبنشيل جزء اللثه دا لكن لو الضرس طالع بميل زي الصوره كدا فالحل ان لازم ضرس العقل يتخلع وبكدا بتكون المشكله اتحلت تماما.
علشان كدا لو حسيت ان فيه وجع وقت طلوع ضرس العقل متقلقش وارد يكون دا طبيعي لكن وارد يكون فيه مشكله علشان كدا لازم ترجع لطبيبك علشان لو هيعمل مشكله نلحقها في اولها 😊
في انتظار اي استفسار لكم بخصوص موضوع النهارده من خلال ماسدجات البيدج او الكومنتات .
