29/05/2023
Nada Kenawyقصة ندى
ندى صاحبتنا من زمان ، بنت جدعة وجميلة من برة وجوة ، كان لما بيبقى فيه مشكلة في أسنانها تجري تكلم مراتي (طبيبة أسنان) بحكم انهم أصحاب وجيران من زمن الزمان ، ومراتي كانت دائما تدلها على زمايلها كل في تخصصه .. ندى كان عندها ضرس مسوس وتحته ضرس مدفون ومسبب لها وجع جامد وكل شوية تروح لحد من زمايلنا الشاطرين في الجراحة اللي طمنوها إن الجراحة بسيطة .. بس هي بتخاف من الحقن و الوجع .. كلمة جراحة أو احنا هنفتح أو هيبقى فيه وجع كانت كلمات مرعبة بالنسبة لها .. لحد في يوم كنا مسافرين وكانت بتحكيلي عن اللف والدوخة وقبلهم الوجع اللي هي فيه .. بصيت على أسنانها والأشعة اللي كانت معاها .. لقيت إن الضرس المسوس تحته خراج وجنبه الضرس المدفون.... معظم الدكاترة بيقولولها تحشي الضرس المسوس حشو عصب وتخلع الضرس المدفون تحته خلع جراحي.. فعرضت عليها فكرة التقويم………
أولا ..هنخلع الضرس المسوس اللي هيحتاج حشو عصب وطربوش واللي على المدى البعيد بيكون ضعيف.
ثانيا ..مش هنتعرض لفكرة جراحة ونقدر نطلع الضرس المدفون ده بالتقويم مكان الضرس المسوس ونستفيد بيه .
ثالثا..نعدل الأسنان الأمامية ونساويهم واللي اكتشفته إن ندى من زمان كان نفسها تعدل أسنانها الأمامية بردو.
طبعا حالة ندى كانت مليانة تحديات خصوصا وإن الأسنان الأمامية جذورها قصيرة نسبيا ومعووجة .. و فيه زمايل لنا قالوا لها الأسنان ممكن تقع وإن النتيجة مش هتكون كويسة .. الحمد لله وبفضله الأمور كانت سلسة، بنحرك الأسنان بقوة بسيطة وواحدة واحدة ومش بنبص على الوقت علشان منضعفش الأسنان أو يحصل تآكل للجذور والأسنان تتلخلخ ، ندى بتيجي في مواعيدها ومحافظة على نظافة أسنانها وملتزمة بكل التعليمات ، الضرس المدفون طلعناه والأسنان الأمامية تساوت وكمان محافظين على العضة السليمة وتناسق الأسنان مع الوجه .. الحمد لله ندى كانت مبسوطة بالنتيجة واحنا كمان فرحانين بانبساطها وبضحكتها المنورة
دائما.
Alma Dental Clinic/Dr Ahmed Saeed
