30/05/2023
حصولي على درجة الماجستير بتقدير #شرف وعلامة قدرها ٩٧ ❤️
MSc with Honours ❤️
———————————————
من حوالي ١٠ سنين كنت عم فكر بأنه كيف أفضل طريقة بتخليني أعرف مين أنا؟ وليش خلقت؟ شو هو الهدف أو المهمة اللي لازم ساويها بهالحياة! كنت ومازلت متأكد إني ما حابب كون متل كتير أشخاص هدفون يناموا وياكلوا ويشربوا وبس!
لهيك بلشت حياتي بالتطوع! تطوعت بكتير أماكن وجربت كتير فرص. درست طب لحتى حس بمتعة إني ساعد! وبالفعل هي المتعة مميزة جداً! إنك تساعد حدا ملهوف هالشي بخليك تكون فخور بحالك!
من حوالي ٤ سنين بلشت بتأسيس مبادرة قلوبنا معكم واللي هي عبارة عن أكتر من ٣٥٠ طبيب بأكتر من ٤ محافظات. تجمعوا لهدف واحد أنو يساعدوا! يساعدوا بس! وساعدنا رقم أكتر بكتير مما ممكن أتخيل وقتا! وبدون أي تمويل أو دعم.
من حوالي ٣ سنين بلشت بماستر صاغ هالأفكار هي بطريقة أكاديمية مهذبة ومنظمة! خلاني أقرب لهدفي. خلاني أقدر فكر بطريقة تخليني فخور بحالي أكتر وأكتر! وهاد الماستر مافيني قول غير هو فضل من الله. فضل من الله لأن تعلمت فيه شغلات أكتر بكتير من اللي كنت بعرفه. فضل من الله لأن كنت قريب من أساتذة كانوا بمثابة المرشدين والمقومين لحياتي الأكاديمية والمهنية بطريقة رائعة.
اليوم بفضل الله، وبفضل أمي وعائلتي، وبفضل أستاذتي الغالية ميسون دشاش اللي هية قدوتي ومثالي الأعلى قبل ما تكون المشرفة الرئيسية على رسالتي ورحلت دراستي، والأستاذ الدكتور عصام جاموس من الاشخاص النادرين بهالحياة شرفني بأنو كان مشرف مشارك على رسالتي.
رسالتي اللي كانت بعنوان (تصميم مقياس لقياس الجانب الإنساني عند الكوادر الطبية)
بفضل الله صار فيني قول إني أخدت شرف وعلامة قدرها ٩٧ درجة.
شكراً جزيلاً. لله أولاً ثم أمي وعائلتي وأستاذتي ميسون الغالية ودكتوري وأستاذي عصام جاموس وكل الذين ساندوني بهذه الرحلة. شكراً جزيلاً لكم جميعاً.
وشكراً للأستاذ منذر بوبو والأستاذ عدنان بدور اللي شرفوني بأنهم كانوا من ضمن لجنة التحكيم على رسالتي.
