19/02/2026
*आज (१९ फेब्रुवारी) छत्रपती शिवाजी महाराजांची जयंती...*
सर्वांनाच प्रेरणादायी असलेल्या युगपुरुष छत्रपती शिवाजी महाराजांची जयंती आज सर्वत्र अपूर्व उत्साहात साजरी होत आहे. शिवाजी महाराज हे उत्तुंग व आदरणीय व्यक्तिमत्त्व असल्याने त्यांच्या कर्तृत्वाचे, गुणांचे, पराक्रमाचे वर्णन करण्यास शब्द अपुरे पडतात. प्रभू श्रीरामांप्रमाणे अत्यंत चारित्र्यसंपन्न दुसरा राजा झाला नाही, अशी त्यांची ख्याती आहे.
आदरणीय शहाजीराजे भोसले आणि जिजामाता यांच्या पोटी १९ फेब्रुवारी १६३० रोजी शिवनेरी किल्ल्यावर शिवरायांचा जन्म झाला. त्यांच्यावर बालपणापासून जिजामाता यांनी केलेले सुसंस्कार शिवरायांचे जीवन व व्यक्तिमत्त्व घडविण्यात कारणीभूत ठरले. सुलतानशाहीच्या जोखडातून रयतेला मुक्त करून एतद्देशियांचे कल्याणकारी राज्य निर्माण करण्याचे जिजामातांचे स्वप्न शिवाजी महाराजांनी जिवलग सवंगड्यांच्या साथीने आणि अनेक मावळ्यांच्या साहाय्याने पूर्ण केले. या ‘शिवगाथे’तील अनेक घटना स्फूर्तिदायी आहेत. स्वत: आघाडीवर राहून शत्रूचा मुकाबला करणे, दूरदृष्टी, मुत्सद्देगिरी दाखवून स्वराज्याचा विस्तार करणे, स्वराज्यासाठी बलिदान द्यावे लागले तरी आपले जीवन सार्थकी लागेल, अशी भावना मावळ्यांमध्ये निर्माण करणे यात शिवरायांचे अलौकिक कौशल्य दिसून येते.
चारित्र्यसंपन्न राहणे, व्यसनापासून दूर राहणे, स्त्रिया, साधू-संत आणि ज्येष्ठ व्यक्तींचा सन्मान, रयतेची काळजी घेणे हे त्यांच्या व्यक्तिमत्त्वाचे आदर्शवत पैलू आहेत. शिवरायांनी आपल्या अमोल सद्गुणांच्या आणि पराक्रमाच्या जोरावर सतराव्या शतकात जो देदीप्यमान इतिहास घडवला तो केवळ महाराष्ट्रालाच नव्हे, जगाला प्रेरणादायी आहे.
छत्रपती शिवाजी महाराजांना जयंतीनिमित्त शतश: प्रणाम आणि मानाचा मुजरा...
जय भवानी... जय शिवाजी...
#छत्रपती_शिवाजीमहाराज #जिजामाता #शहाजीराजे #शिवनेरी #शिवजयंती #प्रणाम #मानाचा_मुजरा
