13/03/2021
♦️" توقع الأسوء لانه هو ده اللي هيحصل " ♦️
المنشور ده مهم جداً
لأي حد تعرض لوجع الأسنان قبل كده
و كمان لأي حد مش عايز يتعرض لها في يوم من الأيام
ولكل أم مهتمة بالحفاظ على أسنان أبنائها
زي ما كلنا عارفين إن العدو الأول للأسنان هو التسوس , بس للأسف مش كلنا عارفين إزاي نمنع حصوله .
أول حاجة نعرف الأول إيه هو #التسوس ؟
⭕ التسوس هو فقدان كالسيوم السنة أو الضرس بسبب أنواع معينة من البكتريا ⭕
طيب هل البكتريا دي بتاكل الكالسيوم بتاعنا ؟
لأ.
إللي بيحصل إن البكتريا وهي قاعدة مع بعضها في المستعمرة البكتيرية و محمية بطبقة بروتينية متكونة على سطح أسناننا , وهما قاعدين يحلّوا ببواقي السكريات اللي إحنا سيبناها لهم . بدل ما يشكرونا إننا سبنالهم بقايا السكريات والنشويات يقوموا يفرزوا أحماض تدوّب الكالسيوم بتاع السنة , بعد كده لو أحنا سكتنا لهم , يدخلوا جوة السنة نفسها و يكرروا العملية دي بس لأنهم سوس بينتشروا في السنة من غير ما يفتحوا فيها فتحة كبيرة فاحنا ما نخدش بالنا إلا لما يحصل الألم و ساعتها يكونوا عبروا أول طبقة اللي هي طبقة المينا
وهنا بقى نسأل سؤال للي كانوا مركزين معانا في القصة إيه هي عوامل التسوس؟
📌١- أول حاجة البكتريا لأن هي اللي أكلت السكر و هي اللي دوبت الكالسيوم و عملت غزو للسنة
📌 2- تاني حاجة السكريات اللي أحنا أكلنها..
و ما ننساش إن في حاجة تانية مهمة في السكريات هي القوام : يعني الحاجة اللزجة اللي بتلزق في الأسنان زي النوجا والكراميل و الشوكولاته خطورتها أكبر بكتير من إنك تاكل السكر بالمعلقة ( و ما أنصحكش أبداً تعمل كده )
📌 3- تالت حاجة هي الفم اللي بيحصل فيه التسوس
بالنسبة للأسنان رغم إن فيه :- 🦷عيوب وراثية بتخلي بعض الأسنان أكثر عرضة للتسوس من غيره.
إلا أن العيوب دي مش بالضرورة تشمل كل أسنان الشخص المصاب كمان حتى مع وجود عيوب وراثية في سطح السنة فبردو نقدر نمنع التسوس فيها
و هنا ناخد بالنا إن مناعة الفم ممثلة في اللعاب ( saliva ) تأثيرها مباشر و أهم من المناعة الجسمية
📌 4- و آخر عامل معانا هنا و اللي في ناس مش واخده بالها منه هو عامل الوقت . يعني إنت بتسيب السكريات على أسنانك وقت قد إيه ؟
و تفتكر لو هتاكل في اليوم أربع قطع شوكولاته الأحسن تاكلهم على مرة واحدة و لا في أوقات مختلفة ؟
جاوبونا في التعليقات.
كفاية كده المرة دي عشان مانطولش و المرة الجاية إن شاء الله نتكلم عن وسائل الوقاية من التسوس .
📌للإستفسارات أكتر إبعتلنا علي رسائل الصفحة.
----------------------------------------------------
White Smile Dental Clinic
معانا يلا جدد ابتسامك واظهر جمالك وكلمنا 👇👇🤩
📌 عنواننا :قنا-دشنا-شارع المركز-برج الحاج/خيرى عسر الجديد-امام مدرسة دشنا الثانويه-الدور الاول علوى
📝 مواعيدنا : من 8صباحا حتي 3عصرا --ومن 5 مساءا حتي 11 مساءا
📞 رقمنا :01090184546
