Dr. Tasnim Ahmed

20/08/2026

دايما بنسأل نفسنا عن سبب الألم اللي بنحس بيه، وطبعا التشخيص بيكون عند طبيب الأسنان.

هوضح بعض العلامات اللي تخلينا نعرف المشكلة اللي حاسين بيها قبل مانروح نعالجها 👇🏻

أولا: الشعور بالألم مع البارد ❄️

وعادة بيكون سبب من اثنين:

• حساسية في الأسنان بسبب تآكل الطبقة الخارجية أو بسبب انحسار اللثة فبيكون مكشوف الجزء الحساس من السنة.

• أو بسبب وجود تسوس بسيط ويفضل اننا نلحق نعالجه قبل تطوره.

ثانيا: الشعور بالالم مع الحلويات 🍫

وده بيكون مؤشر لتسوس بسيط وأيضا يجب معالجته فور الشعور بيه.

ثالثا: الشعور بالالم مع الضغط 🦷

وده بيكون له أسباب كثيرة منها:

• وجود شرخ او كسر في السنة.

• وجود التهاب في اللثة عميق.

• وجود تسوس تحت حشو قديم.

• او وجود تركيبة فيها مشكلة.

رابعا: الشعور بالالم مع الساخن ☕

واستمرار الألم لفترة بعد زوال الحاجة الساخنة، وده بيكون مؤشر لتسوس عميق واصل للعصب ويجب علاجه فورا.

في كل الحالات اللي شرحتها طبعا بيكون التشخيص الاكيد عند طبيب الاسنان بعد عمل فحص الى جانب الشكوى للوصول للتشخيص النهائي.

لو عندكم أي أسئلة هنتظرها في التعليقات أو الرسايل 💬

د / تسنيم أحمد

20/08/2026

29/07/2026

❓من أكثر الأسئلة اللي بيسألها المريض: أحشي ولا أخلع؟!

خلونا الأول نفهم يعني إيه تسوس، وإيه أسبابه، وإزاي نحافظ على أسناننا منه، ولو حصل فعلًا.. بيتعالج إزاي؟

طيب.. حشو عادي؟ ولا حشو عصب؟ ولا خلع؟

🦷 أول حاجة، التسوس بيحدث نتيجة بقاء بقايا الأكل على الأسنان لفترات طويلة بدون غسيل أو تنظيف، فتبدأ البكتيريا تتراكم وتقوم بتحليل بقايا الطعام، وتنتج أحماض بتبدأ تاكل في مينا السن، ودي أول مرحلة من مراحل التسوس.

❓طيب.. إيه الأعراض اللي ممكن يحس بيها المريض؟

في البداية بيكون فيه حساسية أو ألم بسيط مع المشروبات أو المأكولات الباردة أو المسكرة.

✅ في المرحلة دي، أفضل حاجة هي زيارة طبيب الأسنان فورًا لتنظيف التسوس وعلاجه بالحشو المناسب.

❗طيب لو اتأخرنا؟

تبدأ البكتيريا تدخل أعمق وأعمق لحد ما يحصل تآكل أكبر في السن أو الضرس، ويوصل التسوس للعصب.

في المرحلة دي بيكون وجود ألم مع الساخن عرض مميز ليها ..

وفي حالة أن التسوس عميق ولكن الضرس غير متآكل ممكن يحصل خراج وألم شديد جدا مش بيستجيب حتى للمسكنات.
ولو كان الضرس متآكل فبالتالي مش بيحصل خراج ولكن بيحصل موت للعصب وتعفن.

⚠️ ومن الأخطاء الشائعة إن المريض ياخد مضاد حيوي من نفسه، فيهدا الخراج ويقل الألم، فيفتكر إن المشكلة اتحلت ويأجل زيارة الطبيب.

❌ هل كده الضرس اتعالج؟ أكيد لأ.

✅ التصرف الصحيح هو زيارة طبيب الأسنان فورًا لعلاج العصب لتجنب حدوث أي مضاعفات أخرى.

🦷 وفي مرضى كتير أول ما يحسوا بخراج أو ألم شديد يقولوا:
“اخلع يا دكتور!”

لكن الحقيقة إن قرار الخلع أو الحفاظ على السن هو قرار الطبيب فقط.

وطالما الضرس قابل للعلاج والحفاظ عليه، فبنستبعد تمامًا قرار الخلع، لأن الحفاظ على الأسنان الطبيعية هو دائمًا الخيار الأفضل.

لو عندك أي سؤال بخصوص التسوس ابعتلنا اسألنا 🤍

19/07/2026

من أشهر الشكاوى عند المرضى هي رائحة الفم
رائحة الفم هي عرض وليست مرض وهي عرض لأمراض كثيرة :

- التهابات المعدة أحد الأسباب وبالتالي لازم المريض يراجع طبيب جهاز هضمي
- وثاني سبب هو التهابات الجيوب الأنفية
المريض هيسأل ازاي وايه العلاقة
البلعوم هو وصلة بين الجهاز الهضمي والجهاز التنفسي وتجويف الفم .. بالتالي أي شئ هيصب في البلعوم هيأثر تأثير مباشر على الفم.

بالتالي التهابات المعدة سواء وجود باكتيريا أو ارتجاع معدي بتسبب روايح كريهة وأيضا الجفاف وعدم شرب المياه بشكل كافي بيساعد على تكون الباكتيريا داخل الفم
والتهابات الجيوب الأنفية عند نزول الافرازات منها في الفم يتسبب برائحة كريهة وزيادة وجود الباكتيريا وكذلك التنفس الفموي بسبب الالتهابات بيزيد الجفاف ف الفم فيساعد على تكوين الباكتيريا بشكل أكبر

🤔 هل ده ينفي أن في مشاكل بالفم ؟ أكيد لا لأن مشاكل الفم نفسها عادة بتكون أكبر وأكثر الأسباب في وجود رائحة للفم
يجب فحص الفم والأسنان والتأكد من عدم وجود مشاكل زي ايه ؟
أولا التهابات اللثة ووجود الجير على الاسنان
ثانيا التسوس
ثالثا التهابات اللسان وحصوات الغدد اللعابية

بالتالي بيحتاج الشخص الطبيعي لعمل تنظيف للأسنان بشكل دوري في العيادة وكذلك فحص شامل
بيفرق ايه التنظيف داخل العيادة عن غسيل الاسنان في البيت ؟؟
وجود جير متراكم غير مرئي تحت اللثة وهو السبب الأساسي في تجمع الباكتيريا ووجود الرائحة وفي حالات كثير ممكن يسبب أيضا تسوس بسبب وجود جيوب لثوية عميقة.
بالتالي تنظيف الجير في العيادة ليس رفاهية وإنمت خطوة أساسية للحفاظ على صحة الفم والأسنان.

وخليك متأكد دائما أن صحة الجسم تبدأ من صحة الفم .. 🤍
د / تسنيم أحمد

14/07/2026

خلونا نتكلم عن أكثر أسباب بتخلي مريض الأسنان يأجل الزيارة وأحيانا بيلغيها تماما ؟
أولا هو الخوف من طبيب الأسنان ( dental anxiety )ومن الاجراءات نفسها سواء الخوف من الألم أو الخوف من طبيعة الاجراء وطول مدته أو الخوف من عدم الراحة بعد الاجراء ..
وأحب اطمن أي مريض إن مع التطور والتقدم في طب الأسنان علاج الأسنان أصبح أسهل بكثير وأقل ألم من السابق سواء أثناء أو بعد العلاج ..
ثانيا التكلفة المادية وده بسبب ارتفاع التكلفة المادية لعلاجات الأسنان ..
ونقدر نتغلب على المشكلة بكذا طريقة أولا زيارة الطبيب بمجرد ظهور المشكلة وثانيا بيكون متاح عروض وتخفيضات ونظم تقسيط مناسبة وده ف اغلب العيادات ..
ثالث سبب ممكن يكون عدم شعور المريض بالألم الشديد اللي يدفعه لزيارة الطبيب بالرغم من علمه بالمشكلة الموجودة في أسنانه
لازم يعرف المريض ان الألم مش هو الدافع الوحيد لزيارة الطبيب وكل ما توجه لعلاج المشكلة قبل زيادتها كل ما كان أفضل
مثلا : المشكلة البسيطة زي التسوس البسيط مع تأجيله ممكن يتحول إلى تسوس عميق وقد يصل للعصب أو خراج أو يتقدم أكثر يتسبب في خلع الضرس وفقدانه وفي الحالة دي العلاج بيكون أطول وأصعب وأكثر تكلفة
رابعا هو وجود تجربة سيئة سابقة وأيضا قد تكون تجربة غير شخصية ودي من أكبر المشاكل اللي بتدفع البعض لتأجيل زيارة الأسنان ..
لازم يعرف المريض أن سماع تجارب الغير وتطبيقها على نفسه أكبر غلط وده لاختلاف الطبيب واختلاف الاسباب والمشاكل الموجودة وتنوع العلاج من العلاج البدائي الى العلاج الحديث المتطور ..

شاركونا في التعليقات عن أكبر مشاكلكم ومخاوفكم ونساعدكم ازاي تتغلبوا عليها .. 🤍

12/07/2026

يسعدني استقبالكم في عيادة أسنان مستشفى رويال ( مدينة الشروق ) في المواعيد التالية:

🦷 الأحد | 🕔 الساعة 5:00 مساءً
🦷 الخميس | 🕔 الساعة 5:00 مساءً

للحجز أو الاستفسار، يُرجى التواصل عبر رسائل الصفحة أو من خلال أرقام الحجز الخاصة بالمستشفى .

https://maps.app.goo.gl/Tip84sC4r2zYGEMo6?g_st=ic

12/07/2026

أهلا بيكم في صفحتي
أنا د/ تسنيم أحمد

هبدأ اتكلم معاكم عن كل الموضوعات الخاصة بصحة أسنانكم بطريقة سهلة وبسيطة نتعرف من خلالها على طريقة العناية بالفم والأسنان وأيضا أشهر مشاكل الأسنان وكيفية علاجها ..

وأي أسئلة في التعليقات هجاوبكم عليها وممكن تكون موضوع البوست القادم

تابعوا الصفحة وإن شاء الله تستفيدوا ❤️