01/10/2023
جلسة الكشف ( الجزء الثاني )
رجعت تاني من بعد غياب فترة بعتذر عنها جدا 😅
وقفنا في البوست اللي فات عند ان العميل خلص الفورم المطلوبة و انه خلاص هيدخل غرفة الاستقبال عشان يبدا يتكلم مع الدكتور
نقطة صغيرة علي جنب المفروض العميل في البداية بنستقبله في غرفة منفصلة و مستقلة عن غرفة الكشف ( اللي فيها كرسي الاسنان ) و اللي بتكون عبارة عن مكتب عادي جدا بنقعد نتكلم فيه الاول مع بعض عشان نكسر حاجز الرهبة اللي بينك و بين العميل ( اغلب عملاء الاسنان بيقلق اذا مكنش بيترعب من دكتور الاسنان 😃 ) وبالتالي هناخد بالنا كويس من المثل اللي بيقول ( من الدار للنار ) و بالتالي نقعد نتكلم الاول بس هنتكلم في ايه يا تري 🤔
اكيدمن خلال اللي كتبه في الفورم بس ازاي بردو تعالوا نشوف 😉
اولا / المعلومات الشخصية من ( اسم , سن , وظيفة ............. ) تفتكر هل المعلومات ديه بتفيد في خطة العلاج و لا ندخل مباشر علي الشكوى الرئيسية ( سلام عليكم ازيك يا فلان ايه اللي واجعك !!!!!!!!!!!!!!)
- السن بيفرق اكيد في خطة العلاج مجيش مثلا احط ل أنسة خطة علاج فيها تركيب متحرك لمكان ضرس مفقود الحل الاول و الامثل زراعة ( طبعا بيتم مراعاة الوضع المالي للعميل ) ولكن هنا الوضع بيختلف .
- الوظيفة هل العميل شغال وظيفة فيها اجهاد بدني مستمر و دايما تحت Stress او شغله مكتبي طول الوقت و ليه جلسه علي كرسي المكتب غلط غالبا العميل دا بيكون عنده مشاكل في مفصل الفكين .
- مدام متزوجة لو في حالة حمل بيتم مراعاة النقطة ديه في بعض الادوية الخاصة و عدم تعريضها للاشعة ( الا باذن طبيب النسا المباشر ) .
قيس علي كده باقي البيانات اللي بتكون موجودة لهدف مش اعتباطا 😉
ثانيا / البيانات الخاصة بالحالة الصحية العامة للعميل و هنا بنسال علي الأمراض او الأدوية اللي ليها تأثير مباشر علي شغل الاسنان زي مثلا
- السكر و تأثيره علي اللثة و عظام الفكين و اماكن التئام الجرح بعد الخلع او عمليات الزراعة .
- الضغط و علاقته المباشرة بنوع البنج اللي بياخده العميل و تأثيره علي كفاءة اللعاب و كميته داخل الفم .
- امراض العظام ابتداء من نقص الكالسيوم و فييتامين D انتهاءا بالهشاشة و مدي تأثيرها علي كفاءة عملية زراعة الاسنان .
- امراض المناعة عموما و مدي تأثيرها علي انسجة اللثة و الخدين و حتي عظام الفكين و ايه هو تأثير الكورتيزون ( علاج معظم امراض المناعة ) علي البيئة الداخلية للفم .
- امراض القلب و ازاي بناخد حذرنا منها و العميل بياخد مضاد حيوي وقائي قبل الشغل لاصحاب مشاكل صمامات القلب و ازاي ان ادوية السيولة بتأثر علي حسب نوعها علي قرارك ك طبيب .
- الامراض النفسية و ازاي اغلب الادوية اللي بتعالجها بتأثر علي شكل و كفاءة انسجة اللثة ( المسؤل الرئيسي عن نجاح معظم شغل الاسنان ) و لو العميل محتاج ضروري الادوية ديه ايه البديل في الحالة دية
ساعات كتيييير العمي يستغرب كل الاسئلة ديه و يقول هو انا رايح لدكتور باطني و لا قلب و لا جاي عيادة اسنان 😃😃
متنساش هدفنا ( اننا نغير الفكرة السائدة عن عيادات الاسنان و دكتور الاسنان التقليدي )
و بردو متنساش حديث الرسول عليه الصلاة و السلام ( مثلُ المؤمنين في تَوادِّهم ، وتَرَاحُمِهِم ، وتعاطُفِهِمْ . مثلُ الجسَدِ إذا اشتكَى منْهُ عضوٌ تدَاعَى لَهُ سائِرُ الجسَدِ بالسَّهَرِ والْحُمَّى ) يبقي الجسد كله كيان واحد اذا بقي نسال علي الاسنان و نسيب الباقي ( دكتور الاسنان بيعالج انسان قبل ما يكون بيعالج مجرد شوية اسنان 😉 ) .
ثالثا / بنسال بعض الاسئلة الخاصة بشخصية العميل ( هل احنا هنا في جلسة تأهيل نفسي ) يؤسفني هنا اقولك يا صديقي العزيز ( أيوة ) 😂
طيب ليه ؟؟؟ متنساش 99% من العملاء بيترعب من دكتور الاسنان حتي اللي بيدخل للدكتور و يقول ( انا مش بخاف منكم , انا مش بتفرق معايا الحقنة , زيارتكم مش مشكلة بالنسبة ليا و غيرهم كتيير ........) هما دول اكتر ناس تقلق منهم 🤣🤣🤣
كلنا اتربينا زمان علي ان دكتور الاسنان انه بعبع , انه بيدي حقنة في البوء , و انا بيوجع , و انه بيشخط و يزعق دايما , و انه شايفك مهما حصل بتدلع و مفيش وجع و لا تعب و انك لازم تستحمل ...........
الكلام دا كله مش طبيعي اننا نمحيه في لحظه او انك تقول للعميل خلاص الدنيا بقت وردي و التكنولوجيا الحديثة خلصت في ثواني كل دا و بقينا كيوت تخيل العميل هيقول ايه في سره عليك ( دا بيشتغلني , اكيد كلام بيسكتني بيه , دكاتره الاسنان كلامنجيه لحد ما نشتغل و يجيب رجلي .........)😐
كل دا بيتقال واكتر منه و الله عشان كده لازم تسمع من العميل كويس جدا بيقلق من ايه , مش بيحب ايه , بيخاف من ايه , تحط اسئلة بسيطة تعرف بيها طبيعة العميل و ازاي تفهمه و تتعامل معاه بناء علي كل اللي فات
من هنا العميل بيشتريك دكتور ليه مش عشان انت اشطر واحد في شغلك , مش عشان انت شغلك غالي , مش عشان انت فاتح و مكلف احسن عيادة في بلدك ( و ان كان كل اللي فات دا ليه عامل ) ولكن العامل الرئيسي هو ان عميلك ارتاح ليك نفسيا قبل ما تنفذ ليه الشغل المطلوب 👌
رابعا / وديه اخر حاجة هي انك تسال عميلك علي شكوته الرئيسية اللي جالك بيها ( تعبان من ايه ) و هنا بنسمع كويس جدا جدا جدا عشان تسجل كل جزء العميل قاله ( لان العميل هيشتكي من الوجع فقط و قد يقول معلومات محدودة جدا ) هنا دورك ك طبيب متمكن ذو خبرة تبدأ تسال العميل علي ما وراء الاحداث زي ما بيقولوا عشان يديلك المعلومة مفصلة واضحة و بالتالي تكون فكرة واضحة بنسبة 80% عن مشكلة العميل و يبقي ناقص فقط 20% من المعلومة عشان تأكدها
10 % ساعة الكشف و 10% بعد عمل الاشعة المناسبة 👌😉
مش عاوز اكون طولت 😄😄😄بس فعلا الموضوع مش بسيط
هكمل باذن الله في بوست تاني بنعمل ايه لما العميل يبدأ يدخل غرفة الكشف و بنتعامل معاه ازاي
كان معاكم أحمد الفخرانى من El3eyada Dental Center مركز العيادة للأسنان بستقبل و برد معاكم هنا علي الصفحة علي اي استفسار او سؤال يخص مجال طب الاسنان
فرع شبرا مصر/ 01151002221
فرع مدينة جسر السويس الجديدة / 01110300342
